بهروز ایسماعیل زاده دن بیر یازی
شنبه 1 اسفند 1394
+0 بَیَن
اینسان ،بیر دوشونجه نی، موستقیم اولاراق یوخ،غیر موستقیم اولاراق،فیلم،رسیم،فوتوگراف،اؤیکو،و شئعیر له آنلاتماغینین ندن یادا ندنلری نه اولا بیلر؟ ظننیمجه بو آغیر بیر سورودور.بونون جاوابینی ناقیص اولسا بئله ،وئرمک اوچون، باشا قاییتماق گرک. اینسانین ایلک بولوشماسینا،ایلک حئیرتینه، ایلک لذذتینه ،ایلک قورخوسونا،ایلک سوسقونلوغونا.دوشونجه اولاراق ایلکه یه قاییتماق گرک.
ایلکه دئدییمده ،یانی تابولاشمامیش بیر دوشونجه.سینیرلانمامیش.میفه چئوریلمه میش و قانونلار حالینا گلمه میش بیر دوشونجه. اودو ایلک کشف ائتمه هیجانی و حئیرتینه گئری دؤنمک. ایلک لذت. دوشونجه،حئیرت،لذت .بونلاری موستقیم اولاراق آنلاتماق ایمکانسیزدیر. من حئیرتی موستقیم اولاراق سیزه آچیقلایا بیلمه رم نئجه کی لذذتی،نئجه کی دوشونجه نی.بونلاری آچیقلاماق و اؤرنک وئرمک له باشقالارینادا داددیزدیرماق اولار. فرض ائله یه لیم اودو من کشف ائتمیشم. بو ایلکه بیر کشف اولدوغو اوچون حئیرتین یانیندا قریبه بیر لذذت ده وار.اودو خیردالاییب تیکه تیکه ائله مه دن بونو سیزله پایلاشابیلمه رم. تیکه تیکه اولان بیر دوروم یا نسنه ایلکه سیندن اوزاق دوشور.اصلینده من دورومو تیکه پارچا ائدیب آنلاتماق لا اودون ایلکه سینی آنلاتماق ایسته ییرم.بودا بؤیوک بیر پارادوکس دو. و ایستر ایستمز باشقا بیر ساحه لره ده چکیلیر. بو پارادوکسال دورومون ایچینده اؤزل بیر شئیطنت وار. بو شئیطنتین لذذتی نی آنلاتماق اوچون ده اینسان،دوشونجه، و ایمگه یه ال اوزادیر. بیر دوشونجه دن ایمگه نی آلسانیز موستقیم قالیر و آنلاشیلماز اولور. بیر ایمگه دن دوشونجه نی آلسانیز عادی له شیر. اؤرنه یین گؤی اوزونده وار اولان بولود.اولدوز.گون.آی و... مادام کی بیر دوشونجه تاپیلماییب کی اونلاردا حئیرته دوشوب لذذتینی تیکه تیکه ائتمه یه،هر زامان اولدوغو کیمی چوخ زامان اولوب اولمادیقلاری بئله یاددان چیخاجاق.
●قارالاما مانیفئستینین بندلرینده اؤزل بیر سؤزجوک و دوشونجه وار.اودا "شئیطنت" دیر .بیز شئیطنتی دئدیییمیزده ،دوشونجه نین ایمگه له نن وارلیغینین ایچینده کی پارادوکسال دورومونو اؤز باخیشیمیزلا یئنی له دیب،یئنی بیر حئیرته دوشموش لذذت آختارما چاباسیندا ییق.
ایندی بیر سورو گلیر قاباغا.بو شئیطنتی نئجه گؤرمک یادا حیس ائتمک اولار؟
ایجازه نیزله بیر نئچه اؤنملی فیلم و رسیم دن اؤرنک وئرمک له بونو جاوابلاماق ایسته ییرم.
"پیانو"فیلمینده اؤزل بیر یئر وار.باش کاراکتئر اونا باغیشلانمیش آلمان یونیفورماسی لا خارابادان ائشییه چیخاندا،شهرین اینسانلارینین باخیشلاری و دانیشیقلاری، سونرادان ایسه اونون اوستونه سیلاح آچیلماسی بؤیوک بیر شئیطنت ساییر. یؤنتمن بیلینجلی یادا بیلینج سیز اولاراق کاراکتئری شئیطنتلی بیر دوروما سالیر .نه بیلیم بلکه اونجا اؤلوم،خارابالیق،هر شئیین آرادان گئتمه سینه باخمایاراق،ایسته ییب بالاجادا اولسا بیر گولومسه مه یله اومود باغیشلایا توپلوما. بو گولومسه آجی دا اولابیلر.شیرین ده اولا بیلر.آلای ائتمک آنلامیندادا اولا بیلر.
گلین باشقا بیر فیلیمه نظر سالاق."مالئنا"فیلمینین باشلانقیجینی گؤز اؤنونه گتیرین. اوشاق لارین ساحیلده ییغیشیب و "کیشی لیک"لرینی اؤلچمه صحنه سینی، یادا همن فیلمین اورتاسیندا کاراکتئرین عاییله سینی واسیطه سی ایله-اؤزللیکله آتاسینین- اوغلانین روحونا گیرن شئیطانی چیخارتماق تؤرنی. یادا "رویالار"فیلمینین سککیزینجی پلانینی نظره گتیرین.تابوتون دالیسیجا گولوب اوینایا اوینایا گئدن کاراکتئر و...
هر نئچه دنه ایسترسه نیز فیلیم اؤرنک وئره بیله رم. رسیمده بئله اؤرنک لری وار.مونه نین "چیغلیک تابلوسو" ندا کی آرخا پیلاندا دورومدان خبرسیز گلن ایکی آدام. دالی نین"ساعات لار"تابلوسوندا زامانا آلایجی شکیلده داورانیش. بوشون"آخماق لار گمی سی" تابلوسوندا کلوچه نی ایپه باغلاییب اوستن ساللاماسی و...
● بیزیم ایسته ییب اؤنه سوردویوموز شئیطنت، شئعیرین ایچینده کی آغیر فضالارین ایچینده چاشیب قالان اوخوجویا، بالاجا اولسا بئله، بیر دور آخساما قازاندیریب، سونرادان ایسه یئنی دن شئعیره قاییدیب ،و دؤنه لرجه اوخویوب و داها آرتیق حئیرته دوشوب هر سفرینده باشقا لذذت
آلماسی دیر .
"بهروز اسماعیل زاده"