بو قونویا توخونمادان اؤنجه شعیر بیر اؤزنه اولاراق کیملییه مالیک می دیر دییه سورغولاییرام اؤزومو!
شعیرین کیملیی اؤزگورلوک دوشونجه سی ایله ایچ ایچه دیر منجه.شعیر اؤزگورلویون اؤزودور،موخاطبین بیلینجینده کی اؤزگورلویو و شاعیرین یاراتدیغیندان دوغان یئنی بویودلار و ویو لاری دئییرم.بو کیملیک دیر منجه.
کیملیک دوشونجه نین سونسوزلوغونا حاصار چکن قالیب دیر .قارالاما آخینی"اینتیشار تاپمیش خاراکتئر"ی اؤزونده سیغیشدیراجاق قدر آلچاق گؤیول لو دئییل.قارالاما یئنی بیر آلان کیمی اؤزونو آپاریرسا هئچ بیر زامان و مؤوقع ده باشقاسینین دوشوندویو کیمی دوشونوب تیکرارا اوغرامایاجاق.عینی حالدا قارالاما ییرمینجی عصرین سونلارینداکی شاعیرلر کیمی ساده جه و ساده جه گؤردوک لرینی آچیقلاماق و ایمگه لرین کئشیینده قالماق لادا یئتینمه یه جک.قارالاما "کیملیینی کیملییندن سوران عادی بیر اینسان قدر خوشبخت دیر"* منجه ده.قارالاما ایسته دیی آندا یارالدیر و حیاتا باغیشلاییر.گؤردوک لری ایمگه لر باشقالاریندان آلدیغی گؤزلرین یوزومو دور و بو یوزوم لار گوندن گونه بویا باشا چاتیب و بوتون گؤزلری حئیرت ده بوراخیر.قارالامانین کیملیی بیر اؤزگورلوکدن اؤتکی نه اوغرایارکن مین بیرینجی اؤگورلویه تاماه سالماق لا ایضاحا سیغیر، هر زامان اؤزونو یئنیلتمک ایسته ین بیر دوشونجه،دوشونجه نین اؤزودور.قارالاما یوخ دان یاراتماق اوچون وار اولان لارلا بسلنیر ساده جه،اونون اوچون هر زامان دئپوسوندا توخونولمامیش بیر شی لر واردیر.
کیملیک قارالامانین دییشیم سوره جینده باش توتان آنی داورانیشلارداکی ایمگه لردیر.اونون اوچون کیمسه واحید بیر کیملیی قارالامانین قویروغونا باغلایا بیلمز.قارالاما ایسته دیی آن اؤزومو دؤور ووروب و یئنی بیر مؤوقع ده یئنی بیر ایمگه ایله دیشلرینی آغاردیر.قارالاما" کیملیی" آن لاردا دونداریب و هر قونوم دا بیردن-فاضلا-مین ایمگه نی فیقورلاشدیریر و یولونا دوام ائدیر.

آ.ی:کیملیک قبیره یئرله شر دییه بیز جانلی ییق
نت:کیملیک تانیتیم آماجلی ایسه قارالاما گزیشن تین لرین دییشن مؤوقع لرینده کی ایمگه لردیر دئسم عاییب اولارمی دییه سورورام قارالامادان!

*:بهروز اسماعیل زاده نین شعیری
 امین حاجیلو