بهروز ایسماعیل زاده دن بیر یازی

+0 بَیَن
اینسان،اؤزونو یئنی دن باشلاسین دئیه ،تاریخ بویو چئشیدلی دوشونجه لرله اوز اوزه گلمیش.بو دوشونجه لرین هر بیری دئوریم یاراداجاق بیر گوجه مالیک اولدوغو اوچون،بعضی دئولت لر واسیطه سی ایله اوخونوب، گلیشمک اوچون دارتیشماق ندنی ایله قوروملار و اوتوروملار دوزنله نیب.بعضی دئولت لر ایسه اؤز منافع لرینی خطرده گؤردوغو اوچون،اونو نوطفه دن بوغماغا چالیشیب.آما بیر دوشونجه اورتایا چیخدیغی آن دان اؤز حیاتینی سورمک اوچون هئچ کسین اونایینی یادا اونا قارشی چیخانلارین باخیشینا ائحتیاج دورمور.
ائحتیاج دویمور،چونکو دوشونجه بئش اون گونلوک بیر دئولت دئییل کی تملی سارسیلماسین دئیه، گئت گئده دیکتاتولوغا یؤنلده اؤزونو. دوشونجه یاراندیغی گوندن بری اؤزونو نقض ائله مک گوجو وار. و بو پارادوکسال بیر دوروملار ایچینده یاشاییب، شک ائله ییر،دوشونور.و یئنی بیر تئز ایله اورتایا چیخیر.بو دوشونجه تاریخی بیر یازی دا اولابیلر.دینی بیر یازی دا اولا بیلر.میف لرده دوشونولوب و قابیق دییشمه گوجوایله ده اولا بیلر.

دوشونجه، تک باشینا بیر دئوریم دیر. ایستر اوخونسون یادا اوخونماسین.ایستر قبول ائدیلسین ایستر ائدیلمه سین. تک باشینا بیر دئوریم، شعارلا اورتایا چیخماز. یازار واسیطه سی ایله دوشونولوب کاغیذلاردا چوخونلوغا یول آچار.یول آچار دئییرم چونکو بیر توپلوم یئنی بیر دوشونجه نی  زامان کئچسه بئله ،سانسور اولسا بئله ،قاباغی آلینسا بئله ،منیمسه ییب،قبول ائتمک زوروندادیر.هر بیر توپلوم بللی بیر دؤنم ایچینده دورقونلوق یاشاییب،اؤزونده تکرارلانا بیلر آنجاق، توپلومون باشیندا اولانلارین ایدئولوژی سی نین مصرف تاریخی اولدوغو اوچون،گئج یا تئز باشقا یوللار دئنمک اوچون اؤزونده فیرنیخاجاق.

"بهروز اسماعیل زاده"